[سعود عايش الجويسري]

تسرح بي الشيشه عن الناس وسرح=في عالم التفكير مع راس سلوم
لو ان كيف الراس للكبد يجرح=ما دام ذا كيفي فلا همني لوم
افرح ليا شفت المخاليق تفرح=و زعل اذا يشكي من الخلق مضيوم
لو كان دنيا الناس لناس مسرح=و من عاش فيها قال للميت مرحوم
ومن يدعي للعلم لو قام يشرح=ما كل علم(ن) للمخاليق معلوم
خلو فريق الهم يسرح و يمرح=ما دام ما جتله على ضيق وهموم
خلوه في دنيا المحبين يطرح=لا دامت الدنيا لكسرا مع الروم
والبلبل الصداح لا قام يصدح=صوته شجي لا شك ما هو بمفهوم
يمكن يكون بعالم الهم يسبح=ويمكن يكون بغاية الكيف مغروم
ومن يزرع الطيب مع الطيب يربح=ومن يزرع الفتنه من الطيب محروم
طاروق سويته على الكيف لمح=وزكى عطر في تالي البيت مختوم