[حمد بو ضريس العازمي]

نسنس نسيم الليل وأنعش براده=نفسن من إهموم الليالي حزينه

الليل بالقمرا يجمل سواده= ويخلي الشاعر يبيح كنينه

لوكان مابه غير ترك الوساده=ومصامخ الابيات وسط الخزينه

هذاك بيتن ينطلق من عناده=وهذاك يجلس بالقريحه رهينه

وأنا عليّ أختار بيت القياده=وجنب اللي بالسجن ساجنينه

عن السياسه ورتكاب القراده=خليت لي موضوع يدمر مدينه

لوإن عقلي منحرف عن رشاده=ضيعت رزقن للعرب ذاخرينه

لاكني أعرف وش تحوش الركاده=وأعرف يسار الدرب وأعرف يمينه

عاقل ولي عند القصايد سياده=واللي سواتي دارسن من سنينه

مانيب مطفوقن يدور شهاده=من عالمن يم البلا مبتلينه

لاخير فى شهرة غريق البلاده=اللي سهوم الناس تدمي جبينه

خبلن مايدري وين درب الافاده=ولايطيع النصح من ناصحينه

بالدرب عينه كبر عين الجراده=والقلب قلب إبهيم والنفس شينه

يصدم براسه راس شيخن زناده=يذبح وجنده مايعرف السكينه

لو يامره للحرب جهز عتاده=مايخالفه لو تحت رجله يهينه

من يوم شاف الخبل للشر قاده=خلاه ينسى بالجزى والدينه

ذاق القهر منه وحصل هجاده=وأصبح بوسط السجن يزعج ونينه

كل يوم من جنده يبدل قياده=واتلا مصيره بالخلا ذابحينه

وأنا بعلم من يدور مراده=علمن ماترقد منه بالليل عينه

بولع النيران داخل فواده=وقول يالمخطي علومك لعينه

مانيب مسلوب السنع والاراده=والنفس ماهي فى يدينك عجينه

دور من الشعار خبلن فساده=أفسد حياته ثم غدى من قرينه

تلقى عليه إبليس يكرب شداده=ويبرزه للحر مثل السمينه

دايم يسجه للردى والرباده=سج الهجين اللي رجع بالثمينه

تلقاه لمرك ينتعش بالسعاده=ويقول زدني ذل وإلا غبينه

لاشاف دينارك يعبده عباده=لاخايفن ربه ولاصان دينه

ماهوب مثلي ينطحك بالأباده=ويحاربك بسيوف حدبن سنينه

لاتحسب إني ياكبير القلاده=من قل مالي جاهزن للرطينه

أنا على الدنيا قوي الجلاده=من كان مثلي منت لاوي يدينه

مغنيني الله عن كلامن حصاده=نارن لعبدن من ذنوبن تدينه

مير أنصحك خذ من طبيب العياده=إعلاج منه إتعيش فى حال زينه

وإن مالقيت إمن العلاج إستفاده=بعطيك من قول العقول الرزينه

قال المثل رجلن ماتقوى جهاده=عن شره المكروه صافح يمينه

يرشدك هذا وخذ مني زياده=علمن يجنبك الدروب المشينه

خلك مع اللي ينفعك بعتقاده=اللي ماتلقى له عرب مبغضينه

هذا على وضعك ليا أحترت ناده=وشرح له اللي وسط قلبك دفينه

تلقاده لجروحك يسرك ضماده=ويجنبك عن سجن ذيك الكبينه

نوره يزيدك نور وسط الحماده=منته بقايل عقبه الدرب وينه

من سبته تترك جنودن وقاده=وتعيش حرن مانحرم من جنينه

جاك الكلام اللي ترك بك هواده=عن السياسه والفتن والضغينه

خلاك تبكي قدم ذيك الرماده=ثم رجعك للحق قوه ولينه

مرسول من شاعر مايخثع جواده=فى حفرة الشيطان عفن العجينه