[حمد بو ضريس العازمي]

إنكان مزحي معك مزعلك بالحيل=والله أنا مادريت إنك زعولي

ماعاد أنا مزعلك يانافل الجيل=بمشي على إرضاك والضيقه تزولي

مادام من بيننا ماحاصلن ميل=فعلك بطولي وأنا فعلي بطولي

أحباب عشنا على طيب التعاليل=دايم على المذهب الطيّب نجولي

مافرقتنا من العالم مهابيل=ولا نزلنا على الشينه نزولي

نسمع من الناس ونكب الاقاويل=ونحصن الحب فى كل الفصولي

من إجتمعنا على نور القناديل=والطيب لاصار حولك صار حولي

أشوف حبي موردك الغرابيل=وإلاأنت حبك بقلبي ويش أقولي

من سبته دوم عيني تسهر الليل=متعذبن منك يانسل الزحولي

أسهر ووصف جمالك بالتماثيل=اللي لها بين خلق الله قبولي

ياما وصفتك وهولت المشاكيل=من قو مافيك قلته صفقولي

وصفن شريفن مايلقى به مداخيل=بابه عن الشين محكوم القفولي

عزالله إنك يامحمود المواصيل=غالي على خافقي فى كل حولي

أموت لاشفت قدامك عراقيل=وأعيش لانوخت عندك رحولي

أنت الدوى وأنت يانسل الحلاحيل=سقمن على قلب من تترك يطولي

هرجك مثل مايعيش العشب بالسيل=بعد الله إيعيّش الحال الذبولي

وعيونك الناعسه سودن مضاليل=لاسلهمت هولت كل العقولي

والمبسم اللي كما توتن على النيل=مردوع للذبح من لونه عجولي

والريق لاحللوه الطب تحليل=يطلع عسل والعسل منه إمعسولي

والخشم سلة شطيرن من مصاقيل=منه الدما بالوغى مثل السيولي

والوجه بدرن يرد الروح والحيل=ويداوي اللي من السقم إمعلولي

وإلا جديلك حفظك الله من الخيل=سبيب من زينها فاق الخيولي

والزول جملك يالمجمول تجميل=فى مشيتك كنك الريم الجفولي

زينك مابين العذارى موفي الكيل=عنهن تراك أنت بالفوز إمعزولي

تبقى وحيدن بزينك والتنافيل=زادتك بالزين يالترف الكسولي

وأنا لك الله مابدإلك تبديل=ولاني إمطاوعن فيك العذولي

بحفظك حفظ السريره بالمناحيل=وأمشي معك بالهوى حسب الاصولي

مادمت أنا معجبك بين الرياجيل=تراي أنا إمفضلك عن كل زولي

بعاملك بالجمايل بالمقابيل=وبادلك بالمواقف والفعولي

ماني مقصر معك بالحط والشيل=لاشلت لي حمل شلت إلك الحمولي

بنعيش حبن مثل حب البلابيل=اللي بالاعلام شفته من حكولي

صوره عطت درس لاينسى ولاإيزيل=عن قلب من كان بالشينه يصولي

زادت فقيد الوفا ويلن على ويل=ثم صار منها عن الشين إمغسولي

هذا عهد وأنت ياراع المكاحيل=ماوالله إتشوف عن حبك ميولي

لك الوفا بالشدايد والتساهيل=وإلك النظر دوم عن من ينظرولي

ماشوف غيرك ولاأراسل مراسيل=من ودهم بالرسايل لرسلولي

دام أنت فيني ماطاوعت العواذيل=خذني بحبك مثل قيس إمهبولي