عِجْلُ السامري .. !! (بعد الغياب)
 

[poem=font="simplified arabic,5,,bold,normal" bkcolor="transparent" bkimage="" border="none,4," type=0 line=0 align=center use=ex num="0,black"]
\.
.

يا خلف جاني عن الناس في الديرة خبر=كلّ حيٍّ ظاهرٍ في بطن كفه وبر
اخرجوا ذا من قبر وادخلوا ذا في قبر=واحرموا من صوب عجلِ صنعه السامري

أمّةٍ صبت غضبها على موتى القبور=باعوا القرآن بأربع حروفٍ في الزبور
أمةٍ دايم وهي من دبورٍ في دبور=غرّها تنجيم عجلٍ صنعه السامري

من بوقت الحرب يأخذ بعين الاعتبار=رجعته,بيموت ما ثوّرت رجله غبار
المخاليق المخاليق والضيق اختبار=والردي مأمور عجلٍ صنعه السامري

الرجال اشباه بين اكمةٍ سودا وبير=وفي الطبوع ابعد من النير عن قبر الزبير
يا خلف من لا بيكبر وله ربٍّ كبير=مات ما كبّره عجلٍ صنعه السامري

حالفٍ من شالني شبر لآشيله متر=في رجا ستر ولا غير ستر الله ستر
الصلاة ابدى بها شفع وانهيها وتر=لا سجد غيري لعجلٍ صنعه السامري

ما لحقني من مطاول هل الردة فتور=ولا لحق مدة يدي مع كثر ما اعطت قتور
ولا اشتريت بذمتي قرب طاغٍ دكتتور=لا تركت امري لعجلٍ صنعه السامري

مع تتار العصر ما أقربه عصر التتار=عصر من لا خاط ستراً ولا أسدل ستار
لا أرى فيه استتاراً ولا منه استتار=طبخته تنقل لعجلٍ صنعه السامري

يا زمان الملط ما أنت للعاري ستير=والمطايا فيك لو ما مشت باعاً فتير
ما خبرنا مر يوم ولا فينا وتير=ما اهتنى بك غير عجلٍ صنعه السامري

إثر ما في الحمض أحد إثر ماش اصحاب إثر=يا كثر ما قد تحملت منهم يا كثر
واصبح اطيبهم ورا زلّتي قصّاص أثر=وهوّ يا طيبه لعجلٍ صنعه السامري

والله اني لا جبانِ ولا نيب مْعثور=اعطي الموت انحري وازرق البندق يثور
مير من صكّات الايام في جلدي بثور=واشماتة أهل عجلٍ صنعه السامري

عنّزوا للي قضى شبّته طلاّب ثار=عنّزوا للي يلالي لشاف الملح ثار
ما مشى درب انعثار ولا يرضى اندثار=يوم خانوه أهل عجلٍ صنعه السامري

ما درى عن لذّة المرقد الدافي الوثير=واحدٍ حشوة وساده حصاةِ من شثير(1)
ما يعرف من الطفولة قليل ولا كثير=واسألو عنه أهل عجلٍ صنعه السامري

كنّ قلبي لا خفق فرخ طيرٍ في شجر=طيّره من عشّته جاهلٍ بإيده حجر
عزّتي للي لحقه اول الهجرة هجر=والرفاقة صيد عجلٍ صنعه السامري

عن مشاهد نور عينه وهو حيّ مهجور=لا شكى لأحدٍ بكى ما عقب هالجور جور
اشهد ان سواتهم به فجورٍ في فجور=حسبي الله في أهل عجلٍ صنعه السامري

عزّتي للي برجله وهو حرٍّ هجار=بين قومِ تشبهه لا يجير ولا يجار
تسمع الجيران من فوق راسه جار جار=يلعنون اذيال عجلٍ صنعه السامري

يا زمان الأقويا من يجير المستجير=من يظلل كاشف الراس من شمس الهجير
من؟ ومن ياخذ من الطاغية حق الأجير=ليت ما هو بسّ عجلٍ صنعه السامري

من يبي الإنصاف من ظالمٍ صحوه سحّر=مثل من يبغى يلاقي إبرةٍ داخل بحر
من يلقّي لك قفا لا تلقّي له نحر=والقفا كفوك يعجلٍ صنعه السامري

ولّ يا وقتٍ غلبني وانا علّة نحور=من حدر سبع الثرى شاربٍ سبع البحور
يا خلف وقت يؤذّن فطور في سحور=صمته ولا صام عجلٍ صنعه السامري

يا لوقتٍ يبرد الدمّ به والجوّ حار=لا أخذنا عنه موتٍ ولا جاز انتحار
يا خلف كلٍّ على معدنه لولو محار=والفلوس ضروس عجلٍ صنعه السامري

في الخلا ما سر داب الخلا طول الزحير=المنايا وارده والعمر روغة وحير
كل ابن انثى وله ساعةٍ فيها يحير=لو تناسوها أهل عجلٍ صنعه السامري

حالفٍ يا فخر من لا ملا عينه فخر=لأذكرك ما عاشت النفس أياماً أُخَر
يا تماضر بنت عمرو ابكي الفارس صخر=ودوّري له عند عجلٍ صنعه السامري

دوّري له يا تماضر على روس الصخور=وان لقيتي جثّته عطّريها اغلى بخور
واصرخي :وا اخوي يوم اكثر العالم يخور=حيّرت شلفاه عجلٍ صنعه السامري

واعذابي عن مناي انفخوا لي في فُخار=وانزعوني مثل ما ينزع من الما البخار
دعوتي يا دعوة اللي توضّى واستخار=لا تعجّلها يعجلٍ صنعه السامري

ما انت أول من صفى وقته ولا انت الأخير=والدهر ياما قلب خير شرّ وشرّ خير
مير لا تامن لمظلومٍ اقفى مستخير=كم على ايده موت عجلٍ صنعه السامري

هيه لا تامن ولو طقّ لك وقتك صدر=ما آخبر شيْ قد طلع فوق ما حوّل حدر
للدهر وجهين وجهٍ سفِر وآخر ودِر=ردك تشوفه يعجل صنعه السامري

الدهر دولاب ما دارت ايامك يدور=رُبَّ أمراً أسقطت منه ربّات الخدور
كم صدور في فضا وسعها ضيقة صدور=كان ما تدري يعجل صنعه السامري

عن ديار مثل هالدار شدّوا بي لدار=لا يقيم الحر في دار أزكاها جدار
يا مدار الذل ما لأنجمي وسطك مدار=بأتركك لنجوم عجل صنعه السامري

ناقةٍ داخل حناياي ما مرت غدير=عازلٍ عنها جملها وقامت تستدير
يا جمل عيبٍ عليك الرغا عقب الهدير=الرغا خله لعجل صنعه السامري

ما حمى ابن آدم من شرور أبن آدم حذر=ولا لقيت أحدٍ لحبي هك البنت يعذر
ما هو دين قصدهم بسْ حسد نذرٍ نذر=والحسد طبع أهل عجل صنعه السامري

عندلٍ معروفها ما توفّيه النذور=معذور ان متّ فيها معذور ايه معذور
يا بذور سنبلت في الغصون من الجذور=لا متى وانتي لعجلٍ صنعه السامري

اذكريني في آخر الليل من آخر أذار=عاشقٍ ما ارتاع من جيّتك يومٍ وذار
ما مشى عنك اقتدارٍ ولا جاك اعتذار=ولا حنى راسه لعجل صنعه السامري

لك بعيني طفل ريم إلى شافك يذير=صار من قدمك بشير ومن خلفك نذير
يا كثر ما جاك وعيون عدوانه حذير=ما حسب لحساب عجل صنعه السامري

يا خلف غرّا لها أقسمت بيض الغرر=في بهاها لعين من طاوله ليله قرر
بْــ (درر) فمْها تماري بأصابعها (درر)=ما درت بألماس عجل صنعه السامري

ما بها ذرة غرور وفي مشيتها غرور=في الحشا منها أسارى وفي الخارج سرور
من نحرها طائر الأيك طرّش لي كرور=والعمى بعيون عجل صنعه السامري

في الهدب صملة (عميرٍ) وابن عمه (عرار)=مخطرٍ يقدح سنا خدّها الخمري شرار
بين رمشٍ في اسمرارٍ وخدٍّ في احمرار=ساومت بالرجل عجلٍ صنعه السامري

فتنةٍ يسمعها الاصقه ويبصرها الضرير=في ثغرها زمهرير يقبّل قمطرير
يا يديها حالف اني لألفّك في حرير=والفلس حظك يعجل صنعه السامري

يا محلّل دمّ الايتام كلاّ لا وزر=موعدك في يوم ماحدٍ لأحْد يشدّ أزر
كيف تسرق عشقتي من وانا توي بزر=ومن قبل ما اعرفك عجل صنعه السامري

يا خلف ما نيب من يشهد القالات زور=من متى ولحوم الايتام مخلوقه جزور
لو بنرفع فجّ الازوار منا زور زور=من بيدري غير عجل صنعه السامري

عندلٍ مدهالها من الزرار اليا الزرار=لأجلها قارعت روس القبايل من (نزار)
لين لاحوني بنو الجنّ من زيرٍ وزار=والهدف في راس عجل صنعه السامري

عندلٍ مايج بحرها على الجاهل غزير=ما اسدلت دوني رواقٍ ولا حطّت وزير
وجاه من أحيا من الموتة الكبرى عزير=إنها لي لا لعجلٍ صنعه السامري

ليت من شاله على برد جنحانه نسر=صوب أرضٍ دربها الا علي وحدي عسر
بس أنا وكسوري اجمع كسر واطرح كسر=سالمٍ من مكر عجلٍ صنعه السامري

عزّتي للي تعلق بجنحان النسور=عن مقابل أمّةٍ ما منعها عنه سور
ولا تشوم انفوسها عن بقايا كل سور=فوق سفرة كل عجل صنعه السامري

وجد حالي يوم اصفّق يمينٍ في يسار=في رجا من صابني له عن الناس انحسار
ما جذب رجلي مسير ولا خذها مسار=باع هالدنيا لعجل صنعه السامري

ما بقى عندي من الصبر لو جزءً يسير=كل ما امد البصر في اليسير وفي العسير
ينقلب ليّ البصر خاسئاً وهوَ حسير=ما اطولك ياليل عجل صنعه السامري

عندلٍ كنّ البشر حولها ماهم بشر=يوم تمشي كنّهم حولها بساعة نشر
عوّدت عشري عليها ثمانٍ لا عشر=واسعادة حظّ عجلٍ صنعه السامري

من بهاها أحسب الخلق في ساعة نشور=كبّروا منها وهم ما رأوا إلا القشور
حسن خَلْق وحسن خُلْق وحسن رأيٍ وشور=وبالنهاية هي لعجلٍ صنعه السامري

يوم تاقف لا تجد من ولو بأصبع أشار=والنهد واقف على الصدر وقفة مستشار
ويوم تجلس كن الارداف في نصف انتشار=كيف اخلّيها لعجلٍ صنعه السامري

لأقبلت والنهد يهتزّ والشاير يشير=كن نهدها لي عن الصدر مرسلته بشير
كاد ينطق:يا عشير انتبه جالك عشير=لا رماك الله لعجلٍ صنعه السامري

كنْ برمش حبيّبي لا نظر ساعة عصر=عابدٍ ساعة سفر كلّ ما صلّى قصر
من يشوفه من بعيد يْحلف ماله خصر=ياه لو ماهي لعجلٍ صنعه السامري

ولّ يا خصرٍ بسلكٍ من التبر معصور=من شبيهه في الخصور تْعَقب كل الخصور
النهود قْبَبْ قصورٍ لأسلاف العصور=واصبحت في حكم عجلٍ صنعه السامري

عندلٍ ماله شبَه في طوال وفي قصار=فيه ما لا صار من قبل بأمر الله صار
لذّتي به لذّة النصر يوم الانتصار=والهزيمة فال عجل صنعه السامري

عندلٍ قدّامها لا طويل الا قصير=مثلها ما مرّ أحد لا سميع ولا بصير
ما لنا فيها مصيرٍ ولا منها نصير=في سرايا قصر عجل صنعه السامري

يا خلف لعيونها احرقت في اليابس خضر=إيه أنا شاعر مضَر لا أذلّ الله مضَر
لا حضرت اربع قبايل من الجنّ تْحضر=لا أبوهم لآبو عجلٍ صنعه السامري

هيبتي وان كنت غايب تسدّ عن الحضور=وان حضرت انهيت والناس من حولي حضور
احمد اللي ما جبلني على كل مْحضور=ولا ثنى عزمي لعجلٍ صنعه السامري

بْــ _(هداية) كلّ سارّ آتوقّى كلّ ضار=ويعرفني من رأى الموت ساعة احتضار
انعرف لا طال بالواقفين الانتظار=لا خذلهم كلّ عجلٍ صنعه السامري

احمد الله والنظر ما خذل مني نظير=ولا سلبني هيبتي كل ذي شكلٍ نظير
لو عليه اسمع بقلبي خلوجٍ فوق ضير=ما ارتخي مثل اهل عجلٍ صنعه السامري

يا خلف يا مسندي في خطر ساعة خطر=ما ورا الصبخا ذبيلٍ ولو جاها مطر
بْــ شطر وازى شطر وبْـــ سطر أسفل سطر=بانتقم من كل عجل صنعه السامري

ولّ يا قلب غدا بين قطبين مخطور=راح لا أخّر سحورٍ ولا عجّل فطور
دايمٍ من طور في طور عن طورٍ وطور=ما تحايل فيه عجل صنعه السامري

كل يومٍ له شكل كل يومٍ له إطار=وكل ما غمّض عيونه شلع نومه وطار
غادي للهمّ سكّة ولا سكّة قطار=لا رعاك الله يعجلً صنعه السامري

الضعيف ضعيف لو في يده سيفٍ شطير=دام قلبه مخطر لا سمع صوت يطير
والقدر مكتوب ما عنه لأبن آدم مطير=لو تخفّى عنه عجلٍ صنعها السامري

يا خلف مابه سهل ما يجي عقبه وعر=والجبان اقرع ولو لبّسوا راسه شعر
زبوةٍ في ربوةٍ عشبها اليوم استعر=ليتها شبت بعجل صنعه السامري

يا خلف بان الهدف والعيون العور عور=احسب ان الوقت لو شان ما يجرح شعور
واثره اذعر وان تسلّط على حيّ ذعور=فيه من عادات عجل صنعه السامري

ما رعى للناس مبدأ ولا قدّر شعار=له بدال الاسم مليون إسمٍ مستعار
في النشامى منه عار ولو ماهوب عار=واعتلوا فيه اهل عجل صنعه السامري

يا زمان الصعلكة لا تعار ولا تعير=فيك يا كم قبّةٍ أصلها حبّة شعير
كم سببك استتيست عنز واستنوق بعير=والطوال اضحت لعجل صنعه السامري

في رجا من لاتجي البيض معها في ظفر=حسنهن قدامها يعطي الناتج صفر
قلبي الضاري بهيكل هل المشرق كفر=ولا انحنى قدام عجل صنعه السامري

ما طلبت المغفرة من سوى ربٍّ غفور=والقبر مهما تطاول بنا العمر محفور
لعنبو ساس الردي كان دمه ما يفور=ساق دمه عند عجل صنعه السامري

يا كثر ما دجت بالرجل في جرد القفار=من جبل (تتوان) حوّلت في صحرا ظفار
وطحت من معشر (إيادٍ) على معشر غفار=من وراي ظلال عجل صنعه السامري

لا بدا صوتٍ من الحرب جاوب له نفير=والردي جارت عظامه عليه من الصفير
اضرب الصف المناحر من الجمع الغفير=ذاك انا ماهوب عجل صنعه السامري

كلّ خافي يبين ولكلّ أمرٍ مستقر=موعد المسلم عدن موعد الكافر سقر
والفقر فقر المراجل إذا قالوا فقر=يا مدوّر مال عجل صنعه السامري

الصقور صقور مدهالها روس الوقور=والردي في الناس لو عاش ما عاش محقور
حوّلي يا ترثة البوم وارقي يا صقور=عن فضالة أهل عجل صنعه السامري

الوجيه اللي عليها من الطاعة وقار=ذكرها يبقى مع الناس في روس الوقار
والردي منسي ولو زوّد الحمرة شقار=من يعلّم أهل عجل صنعه السامري

ما سوى من لا حوى مجد في الدنيا فقير=ولا سوى من لا رفع راس في الدنيا حقير
ولا سوى من لا جنى طيب في الدنيا عقير=والندامة ردّ عجل صنعه السامري

احمد الله لي على الوكر سبع مية وكر=سدني عن مجد تغلب وعن عزّة بكر
زبدة العمر الثنا بسّ هل من مدّكر=يا موطّي عند عجل صنعه السامري

يا خلف والرزق مقسوم ماهوب محكور=كم ليال وهن أناثٍ تمسّينا ذكور
مير وين اللي لربه على ما جا شكور=لا شكرك الله يعجل صنعه السامري

من حسان المجد في ذمّتي سبعٍ بكار=ابتكرها شايبي ماضي الوقت ابتكار
لين ما صارن لنا عن جميع الناس كار=غيرها ياخذه عجل صنعه السامري

يا مجادل حامل المسك في نفّاخ كير=يا مساوي حبّةٍ من رمل بهضاب كير
من نجى من منكرٍ وين ينجو من نكير=مرجعه في النار عجل صنعه السامري

يا خلف وان كان عمري كذا فأمحق عمر=كم سهج بيضٍ وهن بيض والفاهن سمر
طبت في عمْرٍ ولا طاب لي يومٍ عَمَر=والخيانة طبع عجل صنعه السامري

إن تكاد الأرض من فعلة الطاغي تمور=فلقد مارت لها الأرض في كل معمور
يا ثعال عوّدت تالي الهجرة نمور=دربكم من درب عجل صنعه السامري

يا خلف إن أورق القلب من ذات الخمار=أسالك هل سال من بعدنا وادي نمار
أم بكت منا على الربع حلوات العمار=أم رمى البين أهل عجل صنعه السامري

يا خلف سلطان يومك بطيب اصلك أمير=من يحامي عن حما قبر راعٍ من نمير
ظاهر الاسم العلم لا يعامل كالضمير=لو يحاول فيه عجل صنعه السامري

يا خلف حيٍّ على الوقت ما عنده ظهر=والله إن يصبر على الضيم سبع مية شهر
إن شكى ملطوم وان صدّ مات من القهر=ضاحكٍ سنه لعجلٍ صنعه السامري

يا خلف كم من شبابٍ بأعمار الزهور=شلّحتهم حمر الاقدار لجياع الدهور
كم بطونٍ في الأصل لو نفتّشها ظهور=يكفي الله شرّ عجل صنعه السامري

يا خلف والليل ما طال يمحوه النهار=ذروة الأمجاد من دونها سرد المهار
كل عمرٍ له على صاجة الموت انصهار=وللتراب يعود عجل صنعه السامري

ذا وصلى الله على من لهالأمّة ظهير=خاتمة ما لا نظمه ابن ابي سُلمى زهير
نظم من أفضى إلى النجم بالطرف السهير=عن رواية كل عجل صنعه السامري[/poem]