آه لوتحبني بس كثر ماقلبي يحبك
 

لو تحب اللي يحبك كثر ماقلبه يحبك
والله إن يحيى ويفنى من سعاده في سعاده

لو نسيم الشوق من جوفي ولو مره تهبك
مابقى غصنٍ من العود الخضر ماهو رماده

لو يقول القلب ياريحان قلبك ماحسبك
من يصدقني وقلبي يرتعش لاقيل غاده

ماتشوف إني أجي عريان أبي وصلك وقربك
دمي شماغي ومن دمعي لبست الثوب ساده

يوم أشبك أثري إلى الهم سبع سنين أشبك
ماطرى في بالي إني يوم أبشري لي وساده

أسهرك والهقوه إني لاتعبت أقدر أكبك
ولادريت الآعقب صار السهر للعين عاده

في عيوني صرت أجمّع صورتك دمعٍ وأصبك
لولا خوفي من هلك لبستها صدري قلاده

لو بيدّي ماأنزّل لك جبينك بس ربك
ربك اللي حط في الدنيا عبيد وحط ساده

ماقطعت الياس من شرقك وأنا مشتاق غربك
الإراده عن غرامي فيك مثل اللآ إراده

يامحيرني على جمر الغضى ياقو قلبك
الف ليل وليل والقمرى على خبري سواده

إيه باركض ليه ماأركض دام هذا الدرب دربك
يابلغت القصد أو يايدرك العبد الشهاده

وإن حصل ذا أو حصل ذا مستوي جرحك وطبك
من معه مثلك حلا يستاهل الركضه وتاده

من جمالك يوم أصوت ياقمر كني أسبك
وكل فاتن غيركم قولة قمر غاية مراده

من يقول إنه كتب بك ياخساره وش كتب بك
تمضي الدنيا وكل ماقال كلمات معاده

من يموت بساعته لاطالعك ماهوب ذنبك
كل مقرود يتحمل مايجيه من القراده

آه لو تحبني بس كثر ماقلبي يحبك
ماغدى طول السهرلعيوني القشرا عباده