لاتزيد المواجع
 

شيبي اللي تشوفه ياسليل القروم=إنشد الوقت عنه وإخذ منه الجواب

لاتزيد المواجع والشقى والهموم=إترك اللي عذابه من زمانه عذاب

أنت رجلن عسى الله يسعدك كل يوم=دالهن منت داري عن خطير الصواب

طالبك خلني مالك بردي لزوم=شي مايلزمك لاتفك له يوم باب

رح على موترك لاشفت فوقك غيوم=وإنصب الخيمه بخدن نضيف التراب

إشعل النار فى ليلن نجومه نجوم=وإضحك الله يجيرك مع قروم الشباب

من دلالك خذ اللي مايعقبك لوم=أشقرن ماه صافي من سيول السحاب

إقعد الراس وإقلط فوق فطحة ردوم=وإنقل السالفه من ذيب قدم الذياب

لاتضيّع حياتك بين غفله ونوم=سج رجلك ثم إلبس للسعاده ثياب

خل عنك المناطق وإتجه للحزوم=بالديار الفسيحه لاتسجل غياب

وسع الصدر فيها ياشريف العلوم=وإسعد العين من شوف الشجر والدواب

إفرش إلمرقدك فى خد ربن رحوم=ريح عشبه لاشمه راعي السقم طاب

الخباري بوسطه مثل بحرن لطوم=فيه من يسعدك مثل للحون العذاب

صوت لاوقعت قامت بخدك تحوم=يسعدك صوتها فى جو كله ضباب

السعاده تراها ياقوي العزوم=عند بعض البشر صارت سواة السراب

كم حزينن بهمه كل ليله يعوم=صار مابين قلبه والسعاده حجاب

تذرف الدمع عينه ضايقن وإمحكوم=من همومن تحش القلب حش الحراب

دامها ياوسيع المعرفه ماتدوم=إغتنمها قبل وقت الشقى والذهاب

للمساري خذ اللي يحفظون السلوم=حفظ شيخن خفوقه محتفظ بالكتاب

لاتصاحب رخومن من سلايل رخوم=صرح إبكلمتك قدامهم لاتهاب

قل مايجمع ولي العرش صقرن وبوم=والسباع إلعشاها ماتخاوي كلاب

مثل منته تنقى من جديد الهدوم=نق صحبتك وإكسب بالمواقف رقاب

لاتمازح حزينن طول عمره كتوم=إتركه لاتزيده غربله وإكتئاب

مازح اللي كسب بالمزح ربعن وقوم=السعيد اللذي عقله يدل الصواب

قرب اللي مافى صدره على الناس زوم=وإترك اللي خفوقه مثل ريش الغراب

رجل يحشمك خله منك دوم إمحشوم=وإحتفظ بالصحيب اللي يحل الصعاب

جنب العالم اللي ريحهم ريح ثوم=وإتبع اللي مطيبهم رفيع الحساب

عن مايرغب خفوقك لاتصير إمهزوم=ريح القلب عن من ذب درب الخراب

لو مايبقى لك إمن الناس ياكود توم=يسندونك لياعضك من الوقت ناب

أبرك إمن الرجال اللي تعز الخصوم=وأنت لاحتجتهم منهم تشوف العقاب

مايجي عز نفسك من بخيلن ظلوم=بعد ربك يجي لك من عزيز الجناب

شوم عن من تشوفه عن طريقك يشوم=وإقرب الطيبين إمن العرب والقراب

بكره إمن التجارب ياسليم الثلوم=تحفظ الدرس وبرجلك تدوس ألف داب

الليالي تراها مدرسه للعموم=من سببها عن العالم يطيح النقاب

قلتها وأنت من ردي فلا أنت إمحروم=شيبي اللي تشوفه يانضيف الخطاب

من رخومن جزاهم للكريم إمعدوم=بعد ماطبت فيهم عذبوني عذاب

شفتهم بالشدايد مثل زرق السهوم=يوم تترك خفوقي ملتهب بلتهاب

لاإتصالن ولاوشفيك علم وقوم=وإخذ منا مثل مدك لنا بالزهاب

ذاك جنب وهذا شفت منه الهجوم=من سببهم تراني ذقت مر الشراب

لاكن اليوم شفني مع طوال الكموم=صحبتن بالردي والجحد أبد ماتصاب


بعت ذيك الرخوم بسوق مافيه سوم=ثم قلت الفطايس للخلا والذباب

قمت من غفوتن منها دفعت الرسوم=وإهتنيت إبخفوقن عن هل الجحد تاب