صباح الخير احبتي ..
في الحقيقه جاتني كثير من الاسئله حول هالفتره الي احنا فيها وهي اجازه الصيف والكل يستعد لمغادة بلده بقصد السياحه والاستمتاع باجواء ومناظر جميله (ولا يهون العج عندنا ) :sm12:

شي طبيعي ان الاكل له طعم ثاني في السفر خصوصا لو كنت مسافر لدوله اوربيه , راح تلقى الستيك والسي فود والحلويات المتنوعه ومصانع الشوكلت وغير العصاير الطبيعيه والخبز الفرش (ولا يهون خبزنا المليء بالمواد الكيماويه والخمائر وغير طريقه حفظه بالنايلون الضار).

المشكله هنا بيكون الواحد يروح وهو سمبتيك واخر شياكه ويرجع وهو داخل بالبدله بعد مادهن عمره بفازلين من الشحوم الي تراكمت بجسمه .

بتسئلوني وشهو الحل ؟؟ :1confused:

انا اقولكم :cool:

لا تحرم نفسك من شي ابد .. طبعا مستغربين .. قصدي يا سادة لاتحرم نفسك من الاكل ولكن بكمية بسيطه وابتعد عن الدهون قدر المستطاع وحاول لو اكلت غدا دسم عشاك يكون صحي وخفيف ولو مثلا اشتهيت ايسكريم لا تقول ممنوع , بلعكس خذ لك ايسكريم واستمتع فيه ولكن العشا راح يكون محرم عليك يا حبيب قلبي ودق بريك شوي لانك استنفذت حصتك من السعرات الحراريه الي مخصصه لك يوميا .

طبعا الشباب الي شاركوا وياي بالدايت ونجحوا (اتكلم عن الي نحجوا اما الخايبين ماكلمهم :mad:) لهم 2000 سعره باليوم يوزعونها مثل مايبون .

عندي لكم كم نصيحة انشالله تستفيدون منها وقت السفر ..
1/ الفطور حبذا يكون خفيف ( حليب منزوع او كوفي او شاي والسكر خفيف مره وابعد عن السكر المصنع لانه مليء بمادة السبارتيم الي اثبتوا الغرب انها دمار للجسم + قطعه خبزه قد راحه اليد + نقانق او بيض اومليت بدون زبده + ملعقه شاي مربى او بينت بتر + جبنه مثلثه + او كوب كورن فلكس مع قطع فراوله او موز وهذا احلا فطور افضله في سفري لانه خفيف ومغذي خصوصا اذا كان الفندق الي انت فيه يحط لحم خنزير او شي مقرف )
2/ طلعت تتمشى وشفت محل حلويات اوكي لا تعض اصابعك وتقول ياليتني ضعيف , ادخل المحل واكتفي بقطعه كيك او دونت صغيره ولا تكثر , بس تذكر هالقطعه هذي = 45 دقيقه مشي سريع عشان ما تختزن الدهون والسكريات بجسمك :sm12:
3/ جا وقت الغدا وشميت ريحه البوفيهات والمشاوي من بعيد وغمضت عيونك وخليت حاسة الشم تقودك لهالمكان , اول شي روح لقسم الشوربات واختار اي صنف شوربه اهم شي مافيها كريم او زبده واشربها على راحتك وروق شوي , بعدين روح قسم السلطات واستمتع بالتجول بين الاطباق الخضراء وابعد عن السلطات الي فيها مايونيز وصلصات ولو ماقدرت خذ لك ملقعه وحده بس منها عشان لاتقول منك لله ياوافي حرمتني العيشه :S_45: , روح طاولتك وكل ولاتخلي اهتمامك بالصحن تجول بناظريك وتامل الطبيعه الخلابه وجمال المكان من حولك (الاخوه المتزوجين يفضل ارتداء النظاره السوداء عشان الست هانم ماتلبسك الطبق الي قدامك وتقولك لايق عليك يا حياتي :biggrin:) , بعد ما خلصت صحن السلطه اتجه لقسم المين دش وتمشى على راحتك قبل لا تغرف شي وشوف الشي الي بيكون نافع لك من الناحية الصحيه وقد ماتقدر اكل سي فود ومشاوي وحاول ما تغرف رز او مكرونات وصدقوني لذه الطعام بدوم خبز ورز اكبر من لذتها مع النشويات من واقع تجربه وخبره , لا تشرب وانت تاكل ابدا وخل جنبك نصف كاس ماء فقط , والشرب بعد الاكل بساعتين .
3/ وانت تتجول لقيت بائعه الشوكلت , ابيك بكل قوه تدخل وتسئلها عن الدارك شوكلت القليل السكر وهذا يوجد في اغلب الدول الاوربيه , طعمه رائع بمعنىالكلمه ومافيه سكريات كثير وبالعكس مفيد للقلب ومنشط فعال , لكن هالشي لا يعني انك تاكل صفيحه كامله , مجرد قطعه قد ربع كف ايدك تكفي ( ذكرتنوني في الدارك شوكلت منكم لله :frown:)
4/ نجي لموضوع العشا , طبعا راح تكون بكامل اناقتك ومدلع نفسك ع الاخر ولبسك يا سلام ولا توم كروز , شرايك في وجبه ايطاليه او بلجيكيه او فرنسيه ؟؟ روح لاي مطعم وشوف المينو واسئلهم عن الهلثي فود وراح تلقى اشكال والوان وهم بنفسهم راح يشرحون لك كل طبق ومكوناته واكل وانت مطمن لانهم ناس يقدرون الدايت ويقدرون الاشخاص الي يعتنون برشاقتهم ولا تقول انا لحالي اكل هلثي فود بلعكس , ملايين من الاوربيين اكلهم هلثي ومتوازن غذائيا .
5/ لما تصحى الصباح , شرايك تنزل للنادي الصحي وتقضي فيه ساعه بين الاجهزه الرياضيه وتدلع نفسك بالسونا , ومافيها شي بعد لو تنزل بركه السباحه وتعيش احلا جو خصوا انك بتطلع من البركه وانت اخر انشراح لان دورتك الدمويه تنشطت وجسمك مليء بالادرنالين الي يخلي مزاجك عال العال .


اتمنى لكم سفر سعيد واوقات رائعه وجميله واي استفسار انا بالخدمه احبتي


وافي (لهوازن ) قبل مشاعر